Tengslamyndun

Mikilvægi nándar

Til að rækta tengsl við barn sitt þarf að skapa nánd og sýna barninu ástúð. Í daglegu lífi eykst nálægð milli foreldris og barns og mikilvægt er að hún einkennist af virðingu því þá lærir barn að virða sjálft sig og líkama sinn. Þá fær barnið einnig þau skilaboð að það skipti máli og hafi tilgang í lífi foreldra sinna og sömuleiðis sem einstaklingur. Samband milli barns og foreldris er í flestum tilvikum lengsta sambandið sem barnið á yfir ævina og því er mikilvægt að rækta og það og styrkja. 

​

Mikilvægi öryggis

Góð tengslamyndun milli foreldra og barns veitir barninu tilfinningalegt og líkamlegt öryggi sem er þeim afar mikilvægt. Það gerir barninu meðal annars kleift að skoða umhverfi sitt betur því þá þorir það að leita út fyrir öryggi umönnunaraðila síns. Barnið hefur þá lært og veit að það getur alltaf snúið til baka í öruggt fang hans og fengið þar huggun og væntumþykju. 

​

Gott er að muna að tengslamyndun byggist á næmni umönnunaraðila til að þekkja þarfir og tjáningu barnsins og viðbrögðum hans við köllum þess. Það lærist með tímanum en er ekki meðfædd hæfni foreldra og því er mikilvægt að gefa sér tíma til að kynnast barninu og mynda við það órjúfanleg tengsl.

​

Ánægjuleg samskipti

Mikilvægt er fyrir góða tengslamyndun að samskipti milli umönnunaraðila og barnsins séu ánægjuleg fyrir báða aðila. Þá er gott að hafa í huga að ánægja barns og foreldris af félagsskap hvers annars er mikilvægari en fjöldi þeirra stunda sem þau verja saman. Til dæmis er gott að hafa í huga að draga úr utanaðkomandi truflunum líkt og frá farsíma eða sjónvarpi og njóta samverustunda heilshugar með barninu sínu. Góðar samverustundir geta meðal annars verið að leika með barni, lesa bækur, fara í sund eða njóta annarar útiveru. Ef barni er veitt athygli, hlýja og ástúð sem einkennist af stöðugleika er lagður góður grunnur að andlegu heilbrigði þess. 

​

Áhrif á samskiptahæfni

Tengsl sem barn á við foreldri ræður miklu um það hvernig framtíðar samskipti og sambönd þess verða. Tengsl sem barn hefur myndað við foreldri geta gert aðlögun að leikskóla auðveldari því góð tengsl hafa jákvæð áhrif á aðlögunarhæfni barna í félagahóp og hvernig því semur við aðra. Jafnframt geta góð tengsl haft áhrif á hvernig barn myndar og viðheldur samböndum við vini og maka á fullorðinsárunum. Ef barn fær ekki nægilega ástúð frá foreldrum sínum er líklegra að það upplifi kvíða, hafi mikla þörf fyrir athygli og finni frekar til hefndar tilfinninga sem geta leitt til sektarkenndar og depurðar hjá barninu. Þetta gerist vegna þess að börn hafa mikla þörf fyrir ástúð og umhyggju foreldris en þegar hún fæst ekki upplifir barn erfiðar tilfinningar sem það getur ekki tekist á við eitt síns liðs.